Uppeldi til ábyrgðar (Restitution – Self Discipline) er hugmyndafræði sett fram af Diane Gossen sem byggir kenningar sínar að hluta á sjálfsstjórnarkenningum William Glasser.

Börnum er kennd sjálfstjórn og sjálfsagi með því að efla þeirra innri sálarstyrk. Áhersla er lögð á lýðræðisleg samskipti og býður hugmyndafræðin starfsfólki skýrar vinnuaðferðir og leiðir í vinnu með aga.

Unnið er út frá fimm grunnþörfum einstaklingsins. Grunnþarfirnar eru: Öryggi, umhyggja, áhrif, frelsi og gleði. Hlutverk skólans er að mæta þeirri þörf sem ríkust er hjá hverjum einstaklingi.

Grundvallarhugmyndir kenningarinnar:

• Sjónarmið hvers einstaklings eru virt
• Barninu er hjálpað að þróa sjálfstjórn og sjálfsaga
• Skýr mörk og sáttmálar ramma inn þær væntingar sem samfélagið gerir
• Hvernig vill einstaklingurinn verða, óskaveröldin
• Mistök eru til að læra af þeim

Að innleiða hugmyndafræði sem þessa í stórum skóla gerist ekki á einum degi. Í Sunnulækjarskóla var byrjað í ágúst 2007 og stefnt að því að vinna markvisst með starfsfólki og nemendum næstu árin við að innleiða hugmyndafræðina í starfið.

Sáttmálavinna, þar sem farið er í gildin sem skapa okkar draumaveröld, hlutverkaskipting (mitt og þitt hlutverk) og fleira er þegar farið að sjást í skólanum. Starfsfólk og nemendur munu vinna áfram að því að gera vinnuna sýnilegri og nýta hana markvisst í okkar skólasamfélagi.

Með uppeldi til ábyrgðar stefnum við að því að gera góðan skóla enn betri þar sem samkennd, ábyrgð, gleði og virðing allra nemenda og starfsmanna skapar starfsumhverfið.

Fróðleikur

Bæklingur um Uppeldi til ábyrgðar

Netla – Veftímarit um uppeldi og menntun

Sunnuhvoll

Uppeldi til ábyrgðar-Álftanesskóli

Heimasíða stofnunar Diane Gossen – Restitution

Heimasíða Alfie Kohn.